AZKAR ATERA

Nafarroako Gobernuak gizarte-entitateekiko lankidetza berritu du, 2023an berdintasun-politikak garatzeko

2023/05/18
Nafarroako Gobernuak gizarte-entitateekiko lankidetza berritu du, 2023an berdintasun-politikak garatzeko

Nafarroako Gobernuak, Nafarroako Berdintasunerako Institutuaren bidez (NABI), 573.920 euro bideratuko ditu 2023an berdintasun-politikak garatzeko, erakunde laguntzaileekin hamaika hitzarmen eginez.

Hamaika erakunde horietatik, bederatzi formatu horrekin ari ziren aurreko urteetan, eta beste bi elkarteek lankidetza-hitzarmen bat sinatu dute NABIrekin aurten lehen aldiz.

Hitzarmen horien helburua emakumeen eta gizonen arteko berdintasuna benetakoa eta eraginkorra izateko baldintzak sustatzea da bizitzako esparru eta etapa guztietan, eta Nafarroako Foru Komunitatean emakumeen aurkako indarkeria erauzten laguntzea.

Hala, NABIk lankidetza-hitzarmenak berritu ditu honako elkarte eta entitate hauekin: Nafarroako Udalerrien eta Kontzejuen Federazioarekin (NUKF), toki-eremuan emakumeen eta gizonen arteko berdintasun-politikak indartzeko eta sareko lana bultzatzeko, toki-erakundeetan berdintasun-printzipioa ezartzen laguntzeko; Nafarroako Emakumeen eta/edo Feministen Erakundeen Koordinakundearekin (COMFIN), Nafarroako emakumeen elkarteen edo berdintasunaren aldeko elkarte feministen dinamizazio eta parte-hartze soziopolitikorako proiektua gauzatzeko; eta Ijitoen Idazkaritzaren Fundazioarekin, Nafarroan emakume ijitoen berdintasuna eta ahalduntzea sustatzeko Cali programa egiteko.

Emakumeen aurkako indarkeria desagerraraztea sustatzeko asmoz, Munduko Medikuekin (Nafarroa) gauzatu du hitzarmena, Foru Komunitatean Emakumeen Mutilazio Genitalaren Prebentzioa proiektua egiteko; Itxaropen Gune Elkartearekin, Nafarroan sexu-esplotaziorako salerosketaren biktima diren emakumeei eta prostituzio-testuinguruetan dauden emakumeei zuzendutako abegiko eta laguntzako egoitza-baliabideak kudeatzeko; eta Acción contra la Trata – ACT Elkartearekin, “Bizirik atera diren emakumeak: prozesu pertsonaletik gizarte-eraldaketara” izeneko proiektua garatzeko.

Eta sentsibilizazioaren eremuan, honako hauekin egin du lan: Fundación Instituto y Promoción de Estudios Sociales (IPES) fundazioarekin, Silvia Fernández Viguera Emakumeen Liburutegia-Dokumentazio Zentroa mantentze-lanetarako, garapenerako eta funtzionamendurako, bai eta bizitzaren eremu guztietan emakumeak ikustarazteko helburua duten jarduerak egiteko ere; Nafarroako Emakume Kazetarien Elkartearekin, komunikazio eta informazio-lanetan genero-ikuspegia txertatzeko helburua duten jarduerak egiteko, eta komunikabideetan zabaltzen diren emakumeen irudirako eta haiek aintzat hartzeko kaltegarriak diren estereotipoak eta ereduak ezabatzeko; eta Burlatako Udalarekin, LGTBI+ eremua udalaren egituran  sustatzeko eta laguntzeko, eta herrian berariazko jarduera-programa bat ezartzeko, LGTBI+ pertsonen eskubideak garatu eta bermatzeko, eta Burlata-Burlata udalerrian askatasunean sexu eta afektibitate aniztasuna bizi ahal izateko

NABIrekin lehenengo aldiz hitzarmena sinatu duten bi elkarteei dagokienez, hauek dira: Nafarroako Emakume Enpresari eta Zuzendarien Elkartearekin (AMEDNA) zuzendaritza, lanbide eta enpresa-jarduera duten emakumeen presentzia eta ikusgarritasunarekin lotutako berdintasun politikak indartzeko; eta Eraikiz Hombres Construyendo Igualdad/Gizonak Berdintasunerako Bidean elkartea, gizonei zuzendutako hausnarketa eta formakuntza-guneak sustatzeko, inguruko emakumeekiko eta, oro har, pertsona guztiekiko berdintasunezko portaerak bilatze aldera.


Zerrendara itzuli

Bilatzailea